2Cor 7 | NdeIBE | STEP | Njengoba silezithembiso lezi, bazalwane abathandekayo, kasizihlambululeni ezintweni zonke ezingcolisa umzimba lomoya, siphelelise ubungcwele ngokwesaba uNkulunkulu.

2 Corinthians 7

1 Njengoba silezithembiso lezi, bazalwane abathandekayo, kasizihlambululeni ezintweni zonke ezingcolisa umzimba lomoya, siphelelise ubungcwele ngokwesaba uNkulunkulu.

Intokozo KaPhawuli

2 Sivuleleni izinhliziyo zenu. Kasonanga muntu, kasixhwalisanga muntu, kasenzanga nzuzo ngomuntu.

3 Kangitsho lokhu ukuba ngililahle; ngitshilo ngaphambili ukuthi likhona ezinhliziyweni zethu okungenza siphile kumbe sife lani.

4 Ngilethemba elikhulu ngani; ngiyazigqaja kakhulu ngani. Ngiqungwe isibindi; kuzo zonke izinhlupho zami intokozo yami kayilamikhawulo.

5 Ngoba ekufikeni kwethu eMakhedoniya, umzimba wethu lo wawungelakuphumula, kodwa sasikhathazwa ezindaweni zonke – ingxabano ngaphandle, lokwesaba ngaphakathi. 6 Kodwa uNkulunkulu oduduza abadanileyo, wasiduduza ngokufika kukaThithusi, 7 kungayisikho ngokufika kwakhe kuphela kodwa langokumduduza kwenu. Wasitshela ngokungikhumbula kwenu. Langosizi lwenu olukhulu, lokutshiseka kwenu likhathazeka ngami, ukuthokoza kwami kwaze kwaba kukhulu kakhulu kulanini.

8 Lanxa ngalibangela usizi ngencwadi yami, angizisoli ngayo. Lanxa ngazisola ngayo – ngiyabona ukuba incwadi yami yalikhuba, kodwa okwesikhatshana nje – 9 ikanti khathesi ngiyathokoza, hatshi ngokuba ladaniswa, kodwa ngoba usizi lwenu lwalenza laphenduka. Ngoba laba lusizi njengokujonga kukaNkulunkulu ngalokho thina kasaze salilimaza langayiphi indlela. 10 Usizi lokwesaba uNkulunkulu luletha ukuphenduka okuholela ekusindisweni kungatshiyi nsolo, kodwa usizi lwasemhlabeni luletha ukufa. 11 Khangelani ukuba usizi lokwesaba uNkulunkulu lolu selufezeni kini: ukutshisekela okungaka, lokufisa okungaka ukuba lizigeze, lentukuthelo engaka, lokwethuka okungaka ekuboneni ukulunga kusenziwa. Kukho konke libonakalise ukuthi lina limsulwa kule indaba. 12 Ngakho lanxa ngalilobela, kwakungayisikho ngenxa yalowo owonayo loba lowo owonelwayo, kodwa ukuba phambi kukaNkulunkulu lizibonele ngokwenu ukuthi lithembeke kangakanani kithi. 13 Konke lokhu thina kuyasikhuthaza. Phezu kokukhuthazwa kwethu, sijabuliswa ikakhulu yikubona uThithusi ethokoza, ngoba lonke lasiza ekwenzeni ingqondo yakhe ibe lokuthula.

14 Ngangizincomile kuye ngani, njalo kalingiyangisanga. Kodwa njengoba konke esakutshoyo kini kwakuliqiniso, ngakho ukuzincoma kwethu kuThithusi ngani lakho kubonakale kuliqiniso. 15 Njalo ukulithanda kwakhe kukhulu kakhulu lapho ekhumbula ukuthi lonke lalilalela, limamukela ngokwesaba langokuthuthumela. 16 Ngiyathokoza ngoba ngilethemba elipheleleyo kini.